"I изыдоша из городка на бой мѣсяца октября въ 23 день, на память святаго апостола Иякова, брата Господня. I вси вкупѣ яко единеми усты глаголаху: "С нами Богъ!" и паки: „Господи, помози намъ, рабомъ своимъ!" И начаша приступати к засеке мужственно и сурово зело, и бысть с погаными брань велия; поганіи жъ пустиша стрѣлы тмочисленные с верху засеки і из бойницъ и мнозехъ отъ Ермаковы дружины буйственыхъ овѣхъ уязвляютъ, а иныхъ смертно убиваютъ; поганіи же, видѣвше храбрыхъ мужей падение, и разломиша сами засеку свою в трехъ мѣстехъ і изыдоша на выласку, надѣяхуся казаковъ невозвратному бѣгству предати. I в то время на выласке составишася брань велия, крѣпко бьющеся, дондеже другъ друга за руки емлюще сечахуся; казацы же на поганыхъ вси единодушно устремишася и показавше храбрость свою и жесточь предъ нечестивыми и безбожными Агаряны. По малу же времени поганіи начата оскудѣвати в силе своей; Богъ же казацемъ на поганыхъ побѣду дая, казацы же поля приобрѣтаютъ и одолѣваютъ ихъ и безчисленно поганыхъ побиваютъ, и отъ засеки отбита, и знамена своя на засеву поставиша, и царевича Маметкула уязвиша, но вои его увезоша в малой лодійце за Иртииъ реку. Царь же Кучюмъ стояше на высоцѣ мѣсте, і видѣвъ своихъ Татаръ падение и сына своего Маметкула уязвление и бѣгство, скоро повелѣ мулламъ своимъ кликати свою скверную бусорменскую молитву.
И начата призывати к себѣ на помощъ скверныя своя боги, і не бысть имъ ни мало помощи. I в то время князи Остяцкіи отоидоша с своими людми кождо восвояси.
Царь же Кучюмъ, видѣ свою погибель и царства своего и богатества лишение, рече ко всѣмъ своимъ з горкимъ плачемъ: „О, мурзы и улланове, побежимъ, не медлимъ; сами бо видимъ своего царства лишение; силніи наши изнемогоша, і храбріи воини вси побьени быша. О, горе мнѣ, что сотворю или камо бежу! Покры срамота лице мое: кто мя победи и царства моего лиши? Простыхъ бо людей послаша на мя Строгановы изъ своихъ острошковъ свои мнѣ мстити обиды, атамановъ и казаковъ Ермака с товарищи, не со многими своими людми, и той насъ нашедъ победи и толика намъ зла сотвори: воинство мое избиша и и сына моего уязвиша, еле жива отъ нихъ увезоша, и мене самого посрами и отъ царьства моего отгна; обратися болѣзнь моя на главу мою, и неправда моя сниде на мя, азъ бо чюжая с радостию прияхъ, Русскую землю воевахъ, Пермь Великую и Строгановыхъ острошки, а нынѣ всего своего лишенъ быхъ и самъ побѣжденъ быхъ; нѣсть бо тоя радости на земли иже не пременится на жалость. И прибеже окаянный во градъ Сибирь и взя себѣ мало нѣчто отъ сокровищъ своихъ, і вдашася невозвратному бѣгству, а градъ Сибирь оставиша пусть; храбрый же Ермакъ з дружиною пріидоша во градъ Сибирь, послѣди жъ рекомый Тоболескъ, мѣсяца октября в 26 день, на память святаго великомученика страстотерпца Дмитрия Селунскаго, и прославиша Бога, давшаго имъ побѣду на поганыхъ и окаянныхъ Агарянъ, радующеся радостию. великою."
